• भरतपुर मतगणना विवादको सुनुवाई आज : राजनीतिक प्रतिष्ठाको लडाईं लाग्ला त टुङ्गो ?

    Reporter: Becoming Kishor
    Published: Monday, July 24, 2017
    A- A+
    काठमाडौँ ९ साउन – भरतपुर महानगरपालिका–१९ को मतगणना विवादसम्बन्धी सुनुवाइ आज हुदैछ । न्यायाधीश ओमप्रकाश मिश्र र पुरुषोत्तम भण्डारीको संयुक्त इजलासमा आइतबार सुनुवाइ भएर नसकिएपछि हेर्दाहेर्दैमा आजका लागि राखिएको हो । आइतबार हिजो निवेदकका पक्षबाट वरिष्ठ अधिवक्ता रविनारायण खनाल, अधिवक्ता हरि फुयाँल, बाबुराम दाहाल, हरि उप्रेती, डा चन्द्रकान्त ज्ञवाली, विजयकान्त मैनाली, गोविन्द बन्दी, ईश्वरीप्रसाद भट्टराई र खिमलाल देवकोटाले भरतपुरमा च्यातिएको ९० मत बदर गर्नुपर्ने विषयमा बहस गर्नुभएको थियो ।



    बहसका क्रममा उहाँहरुले मतपत्रको सुरक्षा गर्नुपर्ने पार्टी प्रधिनिधिबाटै मतपत्र च्यातिएको तर मतगणनास्थल भने कब्जा नगरिएको हुनाले मत बदर गर्नुपर्ने तर्क प्रस्तुत गर्नुभएको थियो । निर्वाचन आयोगको कानुनको दफा ५१ (ग) ले च्यातिएको मतपत्रलाई बदर हुने व्यवस्था गरेको छ । सोही अनुसार च्यातिएको ९० मतलाई बदर गर्नुपर्ने तर्क अधिवक्ताहरुको थियो ।

    यसअघि यही साउन २ गते आइतबारका लागि सारिएको थियो । भरतपुर मतगणनासम्बन्धी विवाद आजसम्म आइपुग्दा छैटौ पटक सुनुवाइ हो । तर अहिलेसम्म कुनै टुंगोमा पुग्न सकेको छैन । राजनीतिक प्रतिष्ठाको विषय बनेको यो काण्डमा यसअघि गत असार २६ गते सुनुवाइका लागि इजलास तोकिए पनि सुनुवाइ हुन नसकी सुनुवाइ साउन २ का लागि तोकिएको थियो । त्यसअघि गत असार २३ गते सर्वोच्च अदालतका न्यायाधीश मीरा खड्का र अनिलकुमार सिन्हाको संयुक्त इजलासमा सुनुवाइ शुरु भएपनि नभ्याएर असार २६ गते पेसी तोकिएको थियो ।

    त्यसअघि कामु प्रधानन्यायाधीश गोपालप्रसाद पराजुली र न्यायाधीश हरिकृष्ण कार्कीको इजलासले मतगणनाका क्रममा च्यातिएका मतपत्रसहित सक्कल कागजपत्र ल्याउन आदेश दिएको थियो । सोहीअनुसार अदालतमा च्यातिएका मतपत्रसहित अरू कागजपत्र गत असार १३ गते अदालतमा पेश गरिएको थियो ।

    मतगणना अन्तिममा पुगेकाबेला माओवादी केन्द्रका कार्यकर्ताले ९० मतपत्र च्यातेपछि निर्वाचन आयोगले वडा नं १९ मा पुनःमतदान गर्ने निर्णय गरेको थियो । सो निर्णयका विरुद्ध अधिवक्ता तुलसी पाण्डे र वडा नं १९ का नेकपा (एमाले)का उम्मेदवार गुञ्जमान विकले सर्वोच्च अदालतमा रिट निवेदन दायर गर्नुभएको थियो । रिट निवेदन माथिको पहिलो चरणको सुनुवाइमा न्यायाधीश चोलेन्द्रशम्शेर जबराको एकल इजलासले पुनःमतदान गराउने निर्वाचन आयोगको निर्णय तत्काल कार्यान्वयन नगर्न अन्तरकालीन आदेश जारी गरेको थियो ।

    मतगणनामा भरतपुर महानगरपालिकाको प्रमुख पदका उम्मेदवार एमालेका देवी ज्ञवाली र माओवादी केन्द्रका रेणु दाहालबीच तीव्र प्रतिस्पर्धा थियो । उपमेयरमा भने संयुक्त प्यानलबाट नेपाली कांग्रेसकी पार्वती शाहको जित सुनिश्चित भैसकेको छ । मेयरको टुङ्गो नलाग्दा अहिले सम्म भरतपुर महानगरका जननिर्वाचित प्रतिनिधिले काम गर्न पाइरहेका छैनन् ।

    मेयर मतगणना अहिले सम्म कसको कति मत

    मेयर
    नेकपा एमाले : देवी ज्ञवाली — ४१६४१ मत
    माओवादी केन्द्र/कांग्रेस प्यानल : रेणु दाहाल — ४०९०८ मत
    राष्ट्रिय प्रजातन्त्र पार्टी : बद्री तिमिल्सिना — ६६७५ मत

    उपमेयर
    नेपाली कांग्रेस : पार्वती शाह — ४४९३५ मत
    नेकपा एमाले : दिव्य आचार्य — ३८२५२ मत
    राष्ट्रिय प्रजातन्त्र पार्टी : रिना गुरुङ — ७०८५ मत

    Subjects:

  • No Comment to " भरतपुर मतगणना विवादको सुनुवाई आज : राजनीतिक प्रतिष्ठाको लडाईं लाग्ला त टुङ्गो ? "